Sergio Pedroni

Mia motivaziun

Animals da rapina gronds, spezialmain il luf pericliteschan l’existenza da tut ils purs cun animals da niz e daventan in problem era per turists ed uffants cha van a spass en il guaud. Nus stuain chattar ina soluziun, mintg’onn datti dapli lufs e dapli animals da niz vegnan stgarpads e magliads vivs. Ins vul adina dapli confort per ils animals ed accepta alura ch’il luf als lascha patir fin a la mort.

Mias pretensiuns 

I dat pliras pussaivladads, jau fiss dentant per l’opziun 2:

1. Ins regulescha ils lufs e mantegna mo in dumber fitg limità e controllescha ch’els na sa multiplitgeschan betg; els fissan dentant era uschia anc adina problematics;
   
2. Ins construescha ina saiv enturn insaquants parcs naziunal nua ch’ins sa laschar animals selvadis e lufs uschia che quels sa reguleschan da sasez e na chaschunan nagins donns vid muaglia ed auters animals selvadis. Uschia che era la populaziun dal territori da las alps ed ils turists èn protegids. Questa soluziun spargnass blers daners, perquai che era sche questas saivs autas che impedeschan ch’ils lufs possian scappar, fissan fitg charas, custassan ellas anc adina damain che tut ils daners  che vegnan pajads per la protecziun nunnecessaria da las muntaneras e per ils custs per ils animals stgarpads e per tut il dischurden ch’ils lufs chaschunan. Quai rendess era ventiraivels ils aderents dal luf  perquai ch’ils lufs fissan alura en ils parcs  e na vegnissan mai schluppettads, ed els als pudessan visitar cura ch’els vulan. Ins mantegness uschia in grond dumber da lufs uschia che la Svizra giess era d’accord cun la UE. Tut ils lufs che entran d’auters pajais vegnissan schluppettads immediat u narcotisads e lura purtads en quests parcs naziunals.
   
3. Tut ils lufs vegnissan mazzads e nus vivessan puspè ventiraivels sco enfin avant in pèr onns.

Concretisaziun da l’engaschament 

I dovra la collavuraziun tranter purs, chatschaders e tut ils adversaris dal luf ed i dovra opziuns che san vegnir acceptadas era dals aderents dal luf e da las leschas da protecziun dals lufs, sco per exempel mia opziun 2 survart.

Mia motivaziun

La midada tar la planisaziun dal territori che succeda actualmain ha sco consequenza ch’ins na vegn betg pli a dastgar bajegiar en nossas regiuns da muntogna, entant ch’ins dastga bajegiar adina dapli en regiuns urbanas. Quai è in ulteriur culp per la populaziun en las aglomeraziuns che sa reducescha vinavant, entant ch’ils centers urbans creschan vinavant da maniera surproporziunala, cun tut ils problems ch’els chaschunan per la cuminanza. Quai cuntradi al principi tenor il qual il stadi sto sustegnair ina populaziun sin l’entir territori.

Mias pretensiuns

Nus stuain laschar era a nossas regiuns da muntogna avunda surfatschas da bajegiar e prender davent talas als territoris urbans gia creschids memia ferm. Uschia creschiss la populaziun da las regiuns da muntogna automaticamain e la populaziun urbana na creschiss betg da maniera surproporziunala.

Concretisaziun da l’engaschament

Sco partida stuain nus lantschar in’iniziativa per garantir che la midada da la planisaziun dal territori na chaschunia betg ils problems che jau hai descrit survart. 

Mia motivaziun

Tenor il sistem da taglia actual vegnan chasadas cun duas entradas taxadas tenor las entradas totalas, uschia ch’igl è in dischavantatg  dad esser maridà. 

Mias pretensiuns

La taglia duess vegnir calculada da maniera separada per mintga entrada, uschia ch’ins vegn taxà tuttina, independentamain sch’ins è maridà u viva en in concubinat. Uschia vegniss la discriminaziun actuala evitada.

Concretisaziun da l’engaschament 

Nus sco partida duessan lantschar in’iniziativa per cuntanscher quai.